صباح الفل ، طفلك وصل ٩ شهور 😀، معلش كدا حضرتك دخلتي مرحله جديده ، مرحله مختلفه تماما ، الواد زعبوله كدا بدأ يزحف غالباً او علي الأقل بدا يتحرك وأيده تطول حاجات مكنش بيعرف يوصلها قبل كدا 🤥
العيال في المرحلة دي بتبدأ تكتشف كل حاجه ، ريموت ماشي ، حجاره الريموت شغال ، والأهم والأخطر أشياء ماتحت الحوض 👻

الحاجات الجميله اللي بتكون متخزنه في أماكن غير منطقيه بالمره ، الجاز والصابون وسوايل النظافة 💀 لازم تخلي بالك كويس اوي 👊
المعلم زعبوله ساعتها مش هايعرف دا ايه ، وهايأربع علي طول واشرب يامعلم ، صوتي ياهانم ، اتصلي بالراجل في الشغل صوتي تاني ، فريره علي الدكتور ، الدكتور بسرعه يحولك علي مركز السموم تحجزي هناك ٦ ساعات الي ٢٤ ساعه حسب نوع الحاجات اللي شربها او كلها…وموال طويل عريض 😢😢

طب وليييه 🤔
حضرتك قومي دلوقتي ، ايوا دلوقتي سيبي الموبايل ، معلش يعني اسف لمعاليكي🙏
لفه سريعه في البيت وشوفي ايه الحاجات الليممكن طفلك يوصل لها ، معلش لو فيها رخامه مني ، شيلي الكلام دا كله ، معلش برضوا لو فيها تقل دم مني ، رقم دكتورك علي باب البيت او مكان واضح ، ورقم مركز السموم في العباسية ، عشان لو لأقدر الله حصل حاجه الراجل الغلبان اللي قاعد في شغله بلاش نرعبه خبط لزق ، 🧔 نطمن من الدكتور وبعدين نكلمه عشان هوا نفسه مش هايقدر يعمل حاجه 😔

حاجه بسيطه أهي بس صدقيني الموضوع دا لما بيحصل بيكون من اخطر الحاجات اللي ممكن يمر بيها طفلك ، ولحظات الرعب اللي بشوفها علي الاب والآم هيا اللي بتخليني اعمل التحذير دا ..😐

رايحه فين 🙄 ، مش تعرفي هاتتصرفي ازاي لو حصل لأقدر الله تعرض طفلك لسموم او حاجه .. شوفي اللينك اللي تحت دا 👇🏻

خلاص كدا ، شبر بقي وأنفع الغير 😁
مسائكم سعاده ، وربنا يطمنكم علي اطفالكم ..

#دكتور_عيال